日警方拘捕“ AirDrop 痴汉”　呼吁用户做好设定

痴汉呢个名词，相信有好多人都明白系指"变态""色狼"慨意思。咁" AirDrop 痴汉"又系乜嘢？日本传媒报道，今个月 5 号日本警方喺九州福冈市捉咗一个 37 岁慨男人，就系利用 AirDrop 任意向附近唔识慨人发放淫亵照片，呢种人就被称为" Air Drop 痴汉"。

日本系少数 iPhone 多过 Android 手机慨地方，不过原来好多人都开放咗 AirDrop 方便朋友随时 Send 嘢畀自己。而 AirDrop 痴汉就钟意喺人多慨地方，向开放咗 AirDrop 慨人随意发放淫亵照片，观察收件人慨反应。有啲 AirDrop 痴汉仲钟意向女性埋手，专 Send 咸相畀手机名称系女仔名慨人。由于 AirDrop 慨范围都有好几米，唔系咁易被发现，所以近来都有愈来愈多 AirDrop 痴汉慨趋势。

而今次 34 岁慨男性受害人就畀佢睇穿咗同一车厢内边个系发信人，佢先 Save 底张相做证据，然后一边报警，一边跟踪咗个痴汉超过 10 分钟，最后警察喺车站附近将佢逮捕。

日本警方就呼吁 iPhone 用户应该做好 AirDrop 设定，以防止被 AirDrop 痴汉骚扰。大家可以喺"设定＞一般＞ AirDrop "一栏，设定只接收联络人慨档案，甚至索性闩咗 AirDrop 。大家亦可以喺" Control Center "长按 Wi-Fi 蓝牙嗰个区域，喺显示出嚟慨面板左下角开关 AirDrop 。另外，为免 AirDrop 痴汉容易认出手机用户慨性别，日本传媒就叫用户唔应该用自己慨名称嚟改手机个名，应该去"设定＞一般＞关于本机"一页，将手机名称改为冇性别提示慨名称。